ಮಂಗಳೂರು: ದಶಕಗಳಿಂದ ಮಂಗಳೂರಿನಲ್ಲಿ ಪತ್ರಕರ್ತರಾಗಿ ಸೇವೆ ಸಲ್ಲಿಸಿದ್ದ ಅನಿಲ್ ಜೋಗಿ ಆಕಸ್ಮಿಕವಾಗಿ ಸಾವನ್ನಪ್ಪಿದ್ದಾರೆ. ಅವರ ಮೃತ ದೇಹ ಕೊಳೆತ ಸ್ಥಿತಿಯಲ್ಲಿ ತಣ್ಣೀರುಬಾವಿ ಸಮುದ್ರ ಕಿನಾರೆಯಲ್ಲಿ ಶುಕ್ರವಾರ ಮಧ್ಯಾಹ್ನ ಪತ್ತೆಯಾಗಿದೆ.
ಕಳೆದ ಭಾನುವಾರದಿಂದ ಅವರು ತಮ್ಮ ಸಮೀಪದ ಬಾಂಧವರ ಮನೆಗೆಂದು ಹೋದವರು ನಾಪತ್ತೆಯಾಗಿದ್ದರು. ಸ್ನೇಹಿತರ ಜೊತೆಯಲ್ಲಿ ಇದ್ದಿರಬಹುದು ಎಂದು ಕುಟುಂಬಸ್ಥರು ಭಾವಿಸಿದ್ದರು. ಆದರೆ, ಆಕಸ್ಮಿಕವಾಗಿ ಅವರ ಮೃತದೇಹ ಪತ್ತೆಯಾಗಿದ್ದು, ಅವರ ಸಾವಿನ ಸುದ್ದಿ ಕುಟುಂಬ ವರ್ಗ ಮಾತ್ರವಲ್ಲ ಬಂಧು ಮಿತ್ರರನ್ನೂ ಶೋಕ ಸಾಗರದಲ್ಲಿ ಮುಳುಗಿಸಿದೆ.
ಸರಳ ಸಜ್ಜನಿಕೆಯ ವ್ಯಕ್ತಿತ್ವದ ಅನಿಲ್ ಜೋಗಿ ಕಳೆದ ಹಲವು ವರ್ಷಗಳಿಂದ ಮಂಗಳೂರಿನ ಡೊಂಗರಕೇರಿಯಲ್ಲಿ ಇರುವ ಸಿಟಿ ಕೇಬಲ್ ಸುದ್ದಿ ವಾಹಿನಿಯಲ್ಲಿ ಕ್ಯಾಮರಾಮನ್ ಆಗಿ ಕಾರ್ಯನಿರ್ವಹಿಸಿದ್ದರು. ಕಳೆದ ಕೆಲವು ತಿಂಗಳಿನಿಂದ ತೀವ್ರ ಅಸ್ವಸ್ಥರಾಗಿ ಚಿಕಿತ್ಸೆ ಪಡೆಯುತ್ತಿದ್ದರು. ಕೆಲ ದಿನಗಳ ಹಿಂದಷ್ಟೇ ಮದ್ಯವ್ಯಸನ ತ್ಯಜಿಸಿ ದೈಹಿಕವಾಗಿ ಚೇತರಿಸಿಕೊಂಡಿದ್ದರು. ಮತ್ತೆ ಮರಳಿ ಪತ್ರಿಕೋದ್ಯಮದಲ್ಲಿತೊಡಗಿಸಿಕೊಳ್ಳವ ಹಂತದಲ್ಲಿ ವಿಧಿ ಅವರನ್ನು ಕೈಬೀಸಿ ಕರೆದೊಯ್ದಿತು ಎಂದು ಅವರ ನಿಕಟವರ್ತಿಯೊಬ್ಬರು ತಿಳಿಸಿದ್ದಾರೆ.
ಬೋಂದೆಲ್ ನಿವಾಸಿಯಾಗಿದ್ದ ಅನಿಲ್ ಜೋಗಿ ಕದ್ರಿ ಮಂಜುನಾಥ ಪ್ರೆಂಡ್ಸ್ ಸರ್ಕಲ್‌ನ ಸಕ್ರಿಯ ಸದಸ್ಯ. ಒಂದು ವರ್ಷದಲ್ಲಿ ಅಧ್ಯಕ್ಷರಾಗಿಯೂ ಸೇವೆ ಸಲ್ಲಿಸಿದ್ದರು. ಕಾರ್ಯನಿರತ ಪತ್ರಕರ್ತರ ಸಂಘದಲ್ಲಿ ಉಪಾಧ್ಯಕ್ಷರಾಗಿ, ಕಾರ್ಯಕಾರಿ ಸಮಿತಿ ಸದಸ್ಯರಾಗಿಯೂ ಶ್ರಮಿಸಿದ್ದರು. ನ್ಯೂ ಮಂಗಳೂರು ಚ್ಯಾನೆಲ್, ಮಾಸ್ಟರ್ ಸ್ಟುಡಿಯೋ, ಸಿಟಿ ಕೇಬಲ್ ಚಾನಲ್ ಗಳಲ್ಲಿ ಕ್ಯಾಮರಾಮೆನ್ ಆಗಿ ಕಾರ್ಯನಿರ್ವಹಿಸಿದ್ದರು. ಸುಮಾರು ಹದಿನಾಲ್ಕು ವರ್ಷಗಳಿಂದ ಮಾಧ್ಯಮ ವಲಯದಲ್ಲಿ ಗುರುತಿಸಿಕೊಂಡ ಅನಿಲ್‌ಜೋಗಿ ಅವಿವಾಹಿತರಾಗಿದ್ದರು.
ಅವರ ತಾಯಿ ರಾಜೀವಿ ಜೋಗಿ ಕಾಂಗ್ರೆಸ್ ಕಚೇರಿಯ ಸಿಬ್ಬಂದಿಯಾಗಿದ್ದು, ಪಕ್ಷ ನಿಷ್ಠೆಗೆ ಹೆಸರುವಾಸಿಯಾಗಿದ್ದರು. ಕೆಲ ತಿಂಗಳ ಹಿಂದಷ್ಟೇ ರಾಜೀವಿ ಅವರು ದೈವಾಧೀನರಾಗಿದ್ದು ಅನಿಲ್ ಅವರನ್ನು ಮತ್ತಷ್ಟು ಕುಗ್ಗಿಸಿತ್ತು ಎನ್ನಲಾಗಿದೆ.
ನಗರದ ಎಲ್ಲ ರಾಜಕಾರಣಿಗಳು ಮತ್ತು ಸುದ್ದಿ ವಲಯದಲ್ಲಿ ಉತ್ತಮ ಒಡನಾಟ ಹಾಗೂ ಬಾಂಧವ್ಯ ಹೊಂದಿದ್ದ ಅನಿಲ್ ಎಲ್ಲರಲ್ಲೂ ಸ್ನೇಹ ಭಾವದ ಉತ್ತಮ ಸಂಬಂಧ ಹೊಂದಿದ್ದರು..
ಅವರ ನಿಧನಕ್ಕೆ ಕನ್ನಡ ಜಿಲ್ಲಾ ಕಾರ್ಯ ನಿರತ ಪತ್ರಕರ್ತರ ಸಂಘ ತೀವ್ರ ಸಂತಾಪ ವ್ಯಕ್ತಪಡಿಸುತ್ತದೆ ಎಂದು ದಕ್ಷಿಣ ಕನ್ನಡ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷ ಶ್ರೀನಿವಾಸ ನಾಯಕ್ ಇಂದಾಜೆ ಮತ್ತು ಕಾರ್ಯದರ್ಶಿ ಇಬ್ರಾಹಿಂ ಅಡ್ಕಸ್ಥಳ ಹೇಳಿಕೆ ನೀಡಿದ್ದಾರೆ.
